فیلڈ مارشل، چیف آف آرمی اسٹاف و چیف آف ڈیفنس فورسز حافظ سید عاصم منیر نے جی ایچ کیو میں پاکستان انڈر 19 کرکٹ ٹیم سے ملاقات کی۔ اس موقع پر انہوں نے ایشیا کپ انڈر 19 میں تاریخی کامیابی پر کھلاڑیوں، ٹیم مینجمنٹ اور آفیشلز کو دلی مبارکباد دی۔
پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل نے ٹیم کی نظم و ضبط، باہمی تعاون اور جرات مندانہ کھیل کی بھرپور تعریف کرتے ہوئے کہا کہ یہ کامیابی پوری قوم کے لیے باعثِ فخر ہے اور پاکستان کے نوجوانوں کی بے پناہ صلاحیتوں کی عکاس ہے۔
انہوں نے نوجوان کرکٹرز کو ہدایت کی کہ پیشہ ورانہ معیار برقرار رکھتے ہوئے مسلسل محنت جاری رکھیں اور میدان کے اندر و باہر ملک کے سفیر بن کر پاکستان کا نام روشن کریں۔ فیلڈ مارشل نے کہا کہ نوجوان قوم کے مستقبل کی بنیاد ہیں اور ان کی توانائی، صلاحیت اور کردار ملکی ترقی اور عالمی وقار کے لیے کلیدی حیثیت رکھتے ہیں۔
فیلڈ مارشل سید عاصم منیر نے نظم و ضبط، دیانت داری اور محنت کے ذریعے نوجوانوں کو مختلف شعبوں میں نمایاں کامیابیوں کے لیے بااختیار بنانے کے عزم کا اعادہ بھی کیا۔ اس موقع پر انڈر 19 ٹیم کے اراکین نے فیلڈ مارشل کی حوصلہ افزائی اور تعاون پر شکریہ ادا کرتے ہوئے کہا کہ یہ ملاقات ان کے لیے مزید محنت اور بہتر کارکردگی کا سبب بنے گی۔
