پاک فوج کے شعبہ تعلقات عامہ کے مطابق چیف آف آرمی اسٹاف و چیف آف ڈیفنس اسٹاف فیلڈ مارشل سید عاصم منیر نے راولپنڈی کے کرائسٹ چرچ میں کرسمس کی تقریبات میں شرکت کی اور مسیحی برادری کے ساتھ یہ خوشی کا موقع منایا۔
اس موقع پر فیلڈ مارشل نے مسیحی برادری کو کرسمس کی دلی مبارکباد دیتے ہوئے امن، ہم آہنگی اور خوشحالی کے لیے نیک خواہشات کا اظہار کیا۔ انہوں نے بانیٔ پاکستان قائداعظم محمد علی جناح کو خراجِ عقیدت پیش کرتے ہوئے مساوات، آزادی اور مذہبی رواداری کے وژن کو اجاگر کیا اور کہا کہ اقلیتوں کے حقوق کا تحفظ پاکستان کے نظریے کی بنیاد ہے۔
چرچ میں موجود افراد سے گفتگو کرتے ہوئے فیلڈ مارشل نے قومی ترقی اور سلامتی میں پاکستانی مسیحیوں کے دیرینہ اور قابلِ فخر کردار کو سراہا اور بین المذاہب ہم آہنگی، باہمی احترام اور قومی یکجہتی کی اہمیت پر زور دیا۔
آئی ایس پی آر کے مطابق مسلح افواج آئینِ پاکستان کے تحت تمام شہریوں کی عزت، سلامتی اور مساوی حقوق کے تحفظ کے لیے پُرعزم ہیں۔ مسیحی برادری کے رہنماؤں نے فیلڈ مارشل کے دورے پر شکریہ ادا کیا اور قومی اتحاد کے فروغ میں پاک فوج کے کردار کو سراہا۔
