وفاقی وزیر داخلہ محسن نقوی نے اسلام آباد کو کیپٹل سمارٹ سٹی بنانے کا جامع منصوبہ طلب کر لیا ہے، جس کے تحت شہر کی تمام شہری سہولیات، ریسکیو 1122، ٹریفک، سیکیورٹی اور سی ڈی ایم اے کو ایک مرکزی نظام میں ضم کیا جائے گا۔
یکم جنوری سے اسلام آباد میں بغیر ایم ٹیگ گاڑیوں کے داخلے پر پابندی نافذ ہو گی۔ وزیر داخلہ نے سیف سٹی ہیڈکوارٹرز کا دورہ کیا اور ڈیجیٹل وال پر شہر کی مانیٹرنگ کے نظام، جدید ٹیکنالوجی کے ذریعے امن عامہ کے اقدامات، اور کنٹرول روم میں سپیشل چائنیز ڈیسک کے ذریعے سیکورٹی سرویلنس کا جائزہ لیا۔
وزیر داخلہ نے کیپٹل سمارٹ سٹی منصوبے پر کام کو تیز کرنے کی ہدایت کی اور کہا کہ یہ منصوبہ اسلام آباد کو محفوظ ترین شہر بنانے کے لیے ماڈل کے طور پر اپنایا جائے گا۔ انہوں نے واضح کیا کہ کیپٹل سمارٹ سٹی کے سکوپ اور دائرہ کار کو پورے ملک تک بڑھایا جائے گا اور اصلاحات و ٹیکنالوجی کا مؤثر استعمال وقت کی اہم ضرورت ہے۔
آئی جی اسلام آباد پولیس نے سیف سٹی سے کیپٹل سمارٹ سٹی منتقلی اور محرم الحرام میں کیمروں کے مؤثر استعمال کے حوالے سے تفصیلی بریفنگ دی۔ اس موقع پر وفاقی سیکرٹری داخلہ، چیف کمشنر اسلام آباد، ایڈیشنل ڈپٹی کمشنر جنرل اور دیگر اعلی حکام بھی موجود تھے۔
