اسلام آباد کو ایک جدید اور عالمی معیار کا شہر بنانے کے منصوبے کے تحت وفاقی وزیر داخلہ و نارکوٹکس کنٹرول محسن نقوی نے شنگھائی اربن پلاننگ ہیڈکوارٹر کا دورہ کیا۔ شنگھائی اربن پلاننگ کی سربراہ چن نے وزیر داخلہ کا استقبال کیا اور انہیں شہر کی ماسٹر پلاننگ، ترقیاتی منصوبوں اور جدید شہری سہولتوں پر تفصیلی بریفنگ دی گئی۔
دورے کے دوران محسن نقوی کو شنگھائی میں تیز رفتار ترقی اور شہری سہولتوں کے مربوط نظام سے آگاہ کیا گیا۔ ویڈیوز اور ماڈلز کے ذریعے شنگھائی کی ترقی کے سفر، ماسٹر پلان اور مختلف منصوبوں کی وضاحت کی گئی، جبکہ جدید سہولتوں سے آراستہ اسٹیڈیم کا ماڈل بھی پیش کیا گیا۔
وفاقی وزیر داخلہ نے شنگھائی اربن پلاننگ کے تحت تمام معلومات کو جدید ٹیکنالوجی کے ذریعے یکجا کرنے کے نظام میں گہری دلچسپی کا اظہار کیا اور اسے مؤثر اور فول پروف قرار دیا۔ انہوں نے شہری نظام کو مربوط بنانے کے اقدامات کو سراہتے ہوئے کہا کہ شنگھائی کی تیز ترین ترقی دنیا کے لیے ایک قابلِ تقلید مثال ہے۔
محسن نقوی نے کہا کہ اسلام آباد کو بھی شنگھائی کی طرز پر ترقی دینا چاہتے ہیں اور اس مقصد کے لیے شنگھائی کے ترقیاتی ماڈل سے بھرپور استفادہ کیا جائے گا۔ انہوں نے بتایا کہ اس حوالے سے فوری اقدامات کیے جائیں گے تاکہ وفاقی دارالحکومت کو ایک جدید، محفوظ اور سہولتوں سے آراستہ شہر بنایا جا سکے۔
دورے کے اختتام پر وفاقی وزیر داخلہ نے وزیٹرز بک میں اپنے تاثرات بھی قلم بند کیے۔ اس موقع پر وفاقی سیکریٹری داخلہ محمد خرم آغا، چیف کمشنر اسلام آباد محمد علی رندھاوا اور آئی جی اسلام آباد پولیس علی ناصر رضوی بھی موجود تھے۔
