آئی ایم ایف نے پاکستان کے لیے اہم مالی پیش رفت کا اعلان کرتے ہوئے ایکسٹینڈڈ فنڈ فیسلٹی (EFF) پروگرام کے دوسرے جائزے اور ریزیلینس اینڈ سسٹین ایبلٹی فیسلٹی (RSF) پروگرام کے پہلے جائزے کی منظوری دے دی ہے۔ اس منظوری کے بعد پاکستان کو تقریباً 1 ارب ڈالر کی قسط مل سکے گی اور 20 کروڑ ڈالر تک اضافی رسائی حاصل ہوگی۔
اعلامیے میں کہا گیا ہے کہ رواں برس آنے والے تباہ کن سیلاب کے باوجود حکومت پاکستان نے مضبوط معاشی کارکردگی دکھائی، جس کے نتیجے میں مالی اور بیرونی شعبوں میں استحکام قائم رہا۔ آئی ایم ایف نے میکرو اکنامک استحکام، پبلک فنانس اصلاحات، مسابقت میں اضافہ، پیداواری صلاحیت بڑھانے، سماجی تحفظ مضبوط کرنے، ہیومن کیپیٹل ڈویلپمنٹ اور سرکاری اداروں میں اصلاحات پر خصوصی توجہ دینے کو اہم قرار دیا۔
توانائی کے شعبے کی پائیداری، عوامی خدمات میں بہتری اور اصلاحاتی عمل کی تسلسل بھی آئی ایم ایف کے بنیادی نکات میں شامل ہیں۔ اعلامیے میں یہ بھی واضح کیا گیا کہ حالیہ سیلاب نے فوری ماحولیاتی اقدامات کی اہمیت اجاگر کی ہے، اور حکومت ماحولیاتی لچک بڑھانے کے لیے اصلاحات پر پیش رفت کر رہی ہے، جس میں آئی ایم ایف کے RSF پروگرام کی معاونت شامل ہے۔
