ڈی آئی خان: پولیس ٹریننگ اسکول پر دہشتگردوں کے حملے میں 6 اہلکار اور امام مسجد شہید
خیبرپختونخوا کے ضلع ڈیرہ اسماعیل خان میں پولیس ٹریننگ اسکول پر بھارتی سرپرستی میں سرگرم خوارج دہشتگردوں کے حملے میں 6 پولیس اہلکار اور امام مسجد شہید ہوگئے، جبکہ جوابی کارروائی میں 5 دہشتگرد ہلاک کر دیے گئے۔
پاک فوج کے شعبہ تعلقاتِ عامہ (آئی ایس پی آر) کے مطابق یہ حملہ 10 اور 11 اکتوبر کی درمیانی شب ہوا، جب دہشتگرد اسکول کی بیرونی سیکیورٹی توڑنے کی کوشش کر رہے تھے۔ دہشتگردوں نے بارود سے بھری ایک گاڑی اسکول کے مرکزی دروازے سے ٹکرائی۔
موقع پر موجود قانون نافذ کرنے والے اداروں نے فوری ردعمل دیتے ہوئے دہشتگردوں کے ناپاک عزائم ناکام بنا دیے۔ ترجمان کے مطابق پولیس اہلکاروں نے تین بھارتی حمایت یافتہ دہشتگردوں کو موقع پر ہی ہلاک کیا، جبکہ دو مزید دہشتگردوں کو عمارت کے اندر گھیر کر ختم کیا گیا۔
شدید فائرنگ کے تبادلے میں 6 بہادر پولیس اہلکاروں نے جامِ شہادت نوش کیا، جن میں تربیت حاصل کرنے والے جوان بھی شامل ہیں۔ اس حملے میں 12 پولیس اہلکار اور ایک عام شہری زخمی ہوئے۔
دہشتگردوں نے کارروائی کے دوران اسکول کمپلیکس کی مسجد کو بھی نشانہ بنایا اور امام مسجد کو شہید کر دیا۔ علاقے میں کلیئرنس آپریشن جاری ہے اور تمام ملوث عناصر کو انصاف کے کٹہرے میں لایا جائے گا۔
صدر مملکت آصف علی زرداری، وزیراعظم شہباز شریف اور وزیر داخلہ محسن نقوی نے اس بزدلانہ حملے کی شدید مذمت کی اور شہداء کو خراج عقیدت پیش کیا ہے۔
