سعودی تجارتی وفد دو روزہ دورے پر کراچی پہنچ گیا
سعودی عرب کا ایک اعلیٰ سطحی تجارتی وفد دو روزہ دورے پر کراچی پہنچ گیا ہے، جہاں وہ پاکستان کی کاروباری برادری اور مختلف تجارتی تنظیموں کے ساتھ اہم ملاقاتیں کرے گا۔
ذرائع کے مطابق، وفد کی ملاقاتیں فیڈریشن آف پاکستان چیمبرز آف کامرس اینڈ انڈسٹری (FPCCI)، اوورسیز انویسٹرز چیمبر آف کامرس اینڈ انڈسٹری (OICCI) اور ٹریڈ ڈویلپمنٹ اتھارٹی آف پاکستان (TDAP) کے اعلیٰ حکام سے طے ہیں۔
دورے کے دوران وزیر اعلیٰ سندھ اور گورنر سندھ بھی سعودی وفد سے علیحدہ ملاقاتیں کریں گے، جبکہ معروف صنعتکار عارف حبیب اور کراچی چیمبر آف کامرس کے نمائندوں سے بھی تبادلہ خیال کیا جائے گا۔
ذرائع کے مطابق، سعودی وفد کو بندرگاہوں میں سرمایہ کاری، زراعت، آئی ٹی، کیمیکل اور ٹیکسٹائل سمیت مختلف برآمدی شعبوں پر تفصیلی بریفنگ دی جائے گی۔
مزید برآں، وفد کی ایسوسی ایشن آف بلڈرز اینڈ ڈیولپرز (ABAD) کے رہنماؤں سے بھی اہم ملاقات طے پا گئی ہے۔
