بلوچستان کے ضلع قلات میں سیکیورٹی فورسز نے خفیہ اطلاع کی بنیاد پر کیے گئے آپریشن میں فتنۃ الہندوستان سے تعلق رکھنے والے 12 بھارتی حمایت یافتہ دہشتگردوں کو ہلاک کر دیا۔ آئی ایس پی آر کے مطابق فورسز نے 6 دسمبر کو دہشتگردوں کی موجودگی کی مصدقہ اطلاع پر کارروائی کی اور موثر حکمتِ عملی کے تحت ان کے ٹھکانے کا سراغ لگایا۔
فائرنگ کے شدید تبادلے کے دوران 12 دہشتگرد مارے گئے، جبکہ ان کے قبضے سے بھاری مقدار میں اسلحہ، گولہ بارود اور دھماکا خیز مواد برآمد کر لیا گیا۔ آئی ایس پی آر نے واضح کیا کہ فورسز ’’عزمِ استحکام‘‘ کے ویژن کے تحت ملک دشمن عناصر کے خلاف کارروائیاں پوری قوت سے جاری رکھیں گی۔
وزیراعظم محمد شہباز شریف نے قلات میں کامیاب آپریشن پر سیکیورٹی فورسز کی بہادری کو سراہا اور کہا کہ عزمِ استحکام کے تحت فورسز دہشتگردی کے خلاف نمایاں کامیابیاں حاصل کر رہی ہیں۔ انہوں نے کہا کہ پوری قوم دہشتگردی کے خاتمے کے لیے متحد اور افواجِ پاکستان کے شانہ بشانہ کھڑی ہے۔
صدرِ مملکت آصف علی زرداری نے بھی آپریشن میں 12 دہشتگردوں کی ہلاکت اور بھارتی پراکسی نیٹ ورک کے خاتمے پر سیکیورٹی فورسز کو خراجِ تحسین پیش کیا۔ انہوں نے کہا کہ ریاست پاکستان امن دشمن عناصر کو ہر صورت انجام تک پہنچانے کی صلاحیت رکھتی ہے اور قوم کا عزم فتنۃ الہندوستان کی ہر سازش کو ناکام بنا دے گا۔
